Gen 45 | MEU | STEP | Iosef na badibadinai e gini taudia vairadiai lalona iha-aukana asi dibana; bena e lolo, eto, Taunimanima iboudiai na vairagu ai bae raka lasi. Bena asi tauna ta dekediai Iosef ese tadikakana e hahedinarai henidia, ia be daika.

Genesis 45

Iosef kakana ida e herohemaino

1 Iosef na badibadinai e gini taudia vairadiai lalona iha-aukana asi dibana; bena e lolo, eto, Taunimanima iboudiai na vairagu ai bae raka lasi. Bena asi tauna ta dekediai Iosef ese tadikakana e hahedinarai henidia, ia be daika. 2 Ḡau tamona, e tai lolololo dainai Aigupto taudia bona Farao ena ruma taudia iboudiai na ena tai e kamonai.

3 Bena Iosef ese tadikakana e hereva henidia, eto, Lau binai Iosef, Tamagu na dounu e mauri nohomu eiava? A tadikakana na ihaere-henina asi dibadia, badina be kudoudia e hetaha. 4 Bena Iosef ese tadikakana ma e hamaorodia, eto, Mani a raka kahi mai. Bena idia na e raka henia kahi. Ia ma eto, Lau binai tadimu Iosef, vada o hoigu, bena Aigupto nama. 5 Lalomui basie hisihisi, bona basio hebadu heheni, o hoigu bona ini nama dainai; badina be Dirava ese e siaigu baina gunalaimui, ihamaurimui totona. 6 Badina be ini laḡani rua be doe laḡanidia, a doe laḡanidia ima do mimia, unu laḡani lalodiai tano basie ruaia bona uit basie utua. 7 Dirava ese e siaigu, baina gunalaimui, umui baina hamaurimui bona besemui baina hamauridia helaoreana, bena bese badana ai baola. 8 Taunabunai dia umui, a Dirava ese e siaigu iniseni ai. Ia ese vada e karagu lau be Farao tamana na heto, ena ruma idoinai biaguna ai bona Aigupto tanona idoinai lohiana ai vada e halaogu. 9 Benaini, vada aola haraḡa-haraḡa tamagu dekenai, ba hamaoroa, baota “Natumu Iosef e tomu: Dirava ese Aigupto tanona idoinai lohiana ai vada e halaogu; lau dekegu baoma, basio halahe. 10 Gosen tanona ai do ba noho, lau badibadigu ai: oi bona natumu bona tubumu bona emu mamoe seridia bona emu boromakau seridia bona emu ḡau idoidiai. 11 Lau ese baina narimui, bena oi bona emu orea taudia iboudiai basio hitolo. Badina be doe laḡanidia ima na do mimia”. 12 O itaia: umui matamui ese vada e itaia, bona tadigu Beniamina danu matana vada e itaia, ini hereva na lau udugu amo vada e lasi. 13 Taunabunai, hairaigu idoinai Aigupto ai, bona o ita ḡaudia iboudiai danu, tamagu ba hamaorolaia; bena tamagu ba hakaua mai haraḡa. 14 Bena ia na tadina Beniamina aiona ai e hegagiu dae mai taina ida; Beniamina danu ia aiona ai e hegagiu dae, vada e hetai heheni. 15 Bena Iosef ese kakana iboudiai e harahudia, bona e rosidia mai taina ida. Gabeamo tadikakana ia ida vada e hereva-hereva, asi edia gari.

16 Ini ḡau haridia na Farao ena ruma ai e piua, ena ruma taudia iboudiai na e kamonai Iosef tadikakana vada ema. Bena Farao mai ena hesiai taudia iboudiai vada e moale. 17 Bena Farao ese Iosef e hamaoroa, eto, Tadikakamu ba hamaorodia, baoto “Emui kohu be emui doniki dorudia ai bavato kau, Kanaan tanona ba lou lao, 18 tamamui bona varavaramui bavabidia, ba hakaudia mai dekegu ai; lau ese Aigupto tanona ena ḡau namodia baina henimui, bona ina tano digarana do bavania”. 19 Ma ba hamaorodia, baoto “Ini ba kara toma: ina Aigupto tanona ai rerue bavabi, ba laohai, natumui bona adavamui ba udadia, ba mailaidia, bona tamamui danu. 20 A emui kohu basio laloa, badina be ina Aigupto tanona ena kohu namodia na bavabi emui”.

21 Bena Israel natuna ese iena hereva e badina; bona Iosef ese rerue bona dala lakwana e henidia, Farao ena hahedua heḡereḡerena. 22 Ta ta edia hahedoki toi toi danu e henidia, a Beniamina nasilver monidia sinahu-toi e henia bona hahedoki ima. 23 Herahia ḡaudia danu e siai, tamana ena: doniki gwauta Aigupto kohudia namodia e hua, bona doniki hahinedia gwauta uit bona flaoa bona aniani haida danu e hua, tamana ena dala lakwana. 24 Bena ia ese tadikakana e siaidia lao, eto, Dala ai basio heiri-heiri.

25 Taunabunai idia na Aigupto e toretania, Kanaan tanona ela, tamadia Iakob dekenai. 26 E hamaoroa, eto, Iosef e maurimu, Aigupto tanona idoinai e lohiaiamu. Bena Iakob laumana e daure, edia hereva se abia dae. 27 A idia ese Iosef ena hereva iboudiai e hamaorolaia; bena Iakob ese Iosef e siai reruedia e itadia ai, ia laumana ma e mauri lou. 28 Bena Israel eto, Vadaeni, natugu Iosef dounu e maurimu; lau na do basina mase ai baina ha itaia.